A dì 8, la matina, l’ambasador di Spagna andò in collegio, dicendo che, cercha le cosse di Taranto, si dovesse observar la fede promessa a re Ferando, heriedi et successori. Et interloquendum, disse come erano do compagni, et l’uno havea 100 piegore. Vene il lupo et ne rapite una. El compagno che li volea bene, andò drieto al lupo et astrensello a rilassar la piegora tutta lacerada e squarzada. E dovendola restituir al compagno tal qual era, non la restituì ma se la magnò.
Et l’altro pastor compagno li disse: «ben è tu andato drieto el lupo? »
Rispose: «Sì.» «E dove è la mia piegora che trazesti de bocha del lupo?»
Rispose: «io, vedendo quella esser morta e lacerata, l’ò manzata.»
E il pastor li disse a quel suo amico: «Tanto mi valea che l’avesti lassata manzar al lupo, come haverla manzà ti.»
Ergo etc. Questa parabola fo ben intesa in collegio, che diceva assà nostri non tolesse Taranto, sotto scusa che se vollevano dar a’ turchi.