Fo San Zuane, zorno deputato a dar audientia a l' orator dil Signor turcho. Et eri a Gran Consejo fu publichato tutti li chiamati debba questa matina andar a levar dito orator e condurlo a la Signoria in pena di ducati 10 per il che tutti quelli li fo contra veneno, e di più sier Gabriel Moro el cavalier vestito di veludo cremexio con becheto d'oro; sichè fossemo N. 18 a compagnarlo. Et prima erano venuti in Colegio do rectori, per referir: sier Alvise d' Armer fo baylo e capitano a Corfù e sier Piero Sagredo fo provedador a Zante, tutti do vestiti di veludo cremexin et ben acompagnati da molti zentilhomeni. Et referi solum el Sagredo, et I' Armer fo rimesso a referir Luni,perchè l'havia da dir molte cosse, e dice è de importantia. Et cussi, zonto l'orator dil Turcho, qual fo per nui acompagnato, et smontò a la riva di Palazo, et si vene per Piaza, videlicet oltra l'orator vestito di caxacha di raxo cremexin di solo e di sora damaschin biavo, et posto li soi turchi numero 11 di sora de nui, lo condusemo in Colegio. Era assa' persone a vederlo venir, et il Colegio ben vestito et parte di seda, e il Principe di veludo cremesin. Qual intrato I' orator dentro, il Principe si levò e fo aiutato a venir al pe' dil mastabè e receverlo, et poi fo posto a sentir apresso il Principe. Et per interpetre Hironimo .... è a la Canzelaria nostra,disse dito orator, come I' era venuto a saludar il Doxe e questa Signoria, da parte dil suo Signor, Gran lmperador, e notificharli la gran vitoria auta come il scrive per la letera, qual apresentoe scrita in grecho, et una dil Baylo nostro da Costantinopoli ; e disse el si aveva trova a la bataja apresso Alepo, et zorni 4 da poi Il Signor intrò in Alepo, si parti. El Principe lo charezoe assa', dicendo el fusse el ben venuto, et era visto volentiera per la bona paxe havemo col suo Signor, e si alegremo di la vitoria auta. Et stato un pocho, si levò e cussi fe' il Doxe e lo acompagnò fino al pe' dil tribunal e tolse licentia; et li Consieri veneno fino a la porta di Colegio, poi nui altri lo acompagnasemo fino a caxa. Questo orator è di età di anni .. , ha mal a uno ochio, è nepote di Synam bassà et è homo da ben.