Per letere havute da Saline, per relation data per sier Hironimo de Matio, patron de nave, che herii sera zonse lì con sali per Baruti, cargati a Spina Longa, venuto da Constantinopoli, del qual loco partite, a dì 15 del passato. Dice come Camalì, con una barza et uno schirazo grosso, cargo di rame, et do fuste grosse, era in bocha del streto per ussir et andar in Alexandria; et che li corsari da Rodi li haveva l’ochio a dosso, et tegnivano per spia a Syo uno bergantin armato, per traversarli la strada e prenderlo se potrano. Dice etiam haver per bona via inteso in Constantinopoli, come, a la Cimera, el signor turcho haveva fato cavalchar sanzachi 8 per destruzer quelli albanesi, che mai non cessano di assassinar sì turchi come altri.
Praeterea, come el signor Sophis se atrovava a presso Trabesonda con grande exercito, et haveva preso molti luogi del turcho, et per zornata andava prosperando, in modo che in Constantinopoli si stava con gran terror; et che le zente de la Natolia si acordavano con dito Sophis per tal modo, che lo exercito del dito Sophis ogni zorno più augumentava, et quello del turcho indebeliva; et che andavano anche mal contenti et con molto timor, per el seguito grande et felici prosperamenti ha esso signor Sophis; et che ’l turcho haveva spazato Charzico bassà, per fortificar li dardaneli de Mar Mazor, per dubito non siano tolti dal prelibato Sophis.
Dice etiam dito patron, per el tempo hè stato in Constantinopoli, esser stà mal visto zeneralmente da tuti, sì grandi come picoli, et aver havuto tanta mala compagnia quanto mai fusse fato a la nation.