Del grandissimo poter suo di gente, et de le qualità di quelle.
Si atrova haver el prefacto signor al suo governo im prima dui bassà, l’uno di qualli è nominato Mostafà bassà, et l’altro Achia bassà. Et questo Mostafà vien tenuto huomo sapientissimo, tamen non molto in gratia dil signor, per quanto vien dicto; et questo, per il nome universsal da tuti, de’ esser grandissimo manzador; et hè tenuto esser de la seta de lo Ardevelli, che a presso di noi si chiama Sophì. L’altro, Achia bassà, hè huomo grossissimo, et mostralo anchora nel viso et ne la persona, per esser homo pingue et pieno in volto. Costui hè manzador sencia discretion nè prudentia alchuna, tutavia non manifesto al signor, ma sì ben a’ marchatanti et altri, che per experientia el sanno, chomo la nation nostra. Maxime perchè, quando fu creato bassà, el nostro baylo, con alchun altri de noi, andassimo a la congratulation sua, et inteso noi esser con le mano vote, ne fece star per primo uno buon pezo da basso ne la sua corte, fazandone dir che l’era in el seraglio da le done, et che lui havea da far. Poi per altra via, per il mezo de alchuni sui rufianeli, ne fece intender che ’l non si andava a visitar simel sorta di bassà sencia presenti. La qual cossa intesa, si partissemo, et ritornati da lì alchuni giorni poi con uno honoratissimo presente, et trovando el dicto esser andato a la sua moschea, per esser venere, lo aspectassimo. Il qual ritornato, et vistone con buon ordine, ne fece subito intrar dentro da la sua corte; et prima che ’l si scalzasse gli stivali, nè si posasse ponto, cussì sudato chomo l’era et im piedi aceptò dicto presente, facendone offerte amplissime, che noi potessimo comandar et disponer etc.