Da Corfù, di sier Thomà Zen, di 8. Dove sequite gran rumor un zorno, per alcuni compagni di stendardo dil capetanio zeneral Grimani con quelli di la terra; adeo si levono do parte, et il baylo, sier Antonio Moro, mandò suo fìol, sier Zuanne, per sedar; al qual li fo dato di uno vereton in uno brazo. E alcuni di quelli da Corfù cridava: Turco! Turco!
Tamen el Zem adatò; licet par non sia obedientia per li erori sequidi. Et che il zeneral consegnò li libri a ditto sier Tomà Zen, volendo vegnir via con . . . galie; qual lo persuase non venisse, dicendo tornasse a Corfù, perchè era a Casopo. Et disse: Si vegnireti, la Signoria vi farà apichar. Al qual presentò letere di la Signoria, come fu zonto, che era andato a’ zardini con li patroni e soracomiti. Et lezando quelle, stete molto suspeso; poi se voltò versso li patroni di le galie grosse, dicendo: Io ve comando, da parte di la Signoria, che de presente debiè consignar le vostre galie, excepto il Polani e Prioli e il capetanio dil trafego; e vuj tutti con uno gripo, insieme dogiè andar a Veniexia, a presentarve a le prexon.