A dì X ditto. Fo pregadi, perhò che haveano certe materie dil turco, le qual poi fono tirate nel conseio di X, perchè par, che ’l prothoiero di la Morea havia rechiesto a’ mothonei, li sia mandato tre citadini a Castel Tornese, perchè havia cosse importante di parlar; dove andò Bernardo Zivran con do altri, e rechiese voleva far trieva per uno o do mexi, per nome dil turcho, con la Signoria. Et lhoro disseno, senza licentia dil zeneral niente fariano. Et fo sospetato volesse far, per meter la sua armata in locho securo, la qual era in colpho; sì che, ritornati, avisoe li retori di Modom, e il capetanio zeneral, et poi la Signoria nostra.