Noto, chome a dì 7 di l’ instante, fu preso parte im Pregadi di confirmar certi capitoli col conte Stefano Marovich, conte Vuchich, Jucovich et altri conti di Crayna, qualli erano soto il turcho, et per mezo di sier Marin Moro, conte di Spalato, et il conte Zuanne Petrovich de Poliza, venuti sotto la devution di la Signoria nostra; et li fo confirmati li capitoli, e datoli provision di quello si trarà di Crayna, paese dil turcho etc. Et have la ditta parte 160 di sì, do di no, et una non sincera. Et in l’ arsenal fu fato uno bastion, poi da mandarlo a meter a certa ponta a Narenta, per tenir la ditta Crayna; el qual bastion fo mandato de qui, e fu posto al locho, chome più difusamente più avanti scriverò al suo locho. E fo speso qualche dinar in meterlo e in custodirlo; ma pocho pocho valse, che fu tolto da’ turchi e ruinato. Ergo etc.