Di sier Simon Guoro proveditor di l’armada data in galia a presso Corfù, a dì primo april.
Manda lettere vien da Costantinopoli con la galia di sier Polo Nani fin a Zara; et à pur aviso di l’armada ch’era grossa, e lui à mandato a far comandamento per el ditto sier Polo Nani che tutti li navilii di cheba che troverà debi venir a Corfù.
Item, avisi da sier Stefano Viaro, di 18 marzo, di dita armata et che ’l Signor à fato far comandamenti a quelli lochi zoè lì intorno dove esso sier Stefano si atrovava, che tutti quelli signori in termine di zorni 15 si debano star in hordine e preparati per cavalchar, perché in questo tempo verà il mandato di fuogo, et si dice el Signor turcho vol venir in persona a la Valona e fa gran numero di botte, ad quid non sa.
Item, replica quello scrisse per lettere di 23 marzo che a la Valona era stà butà in aqua 6 fuste una di banchi 18, l’altra 16, l’altra 10, e l’altra 6 con hordine di trovar altri schierazi e andar a le spiaze di Puja a tuor il corpo di Gem sultam e condurlo a la Valona, etiam che vadino contra corsari.