Da Corfù dil baylo di 7 di zener, venuta insieme con le altre, la qual non fu leta, perhò non è posta al loco suo.

Come quel Mustafà bei bassà di la Valona era venuto a l’incontro di Corfù per edifichar certi luogi, et lui havia fato provision sì a Corfù come a Butintro e Parga, e vol più tosto de facil creder che esser imputà, et non credendo esser inganà. Et havia da Costantinopoli sempre si lavorava l’armada; pertanto voria tornesi, compirà le mure, farà cavar il fosso, vol serar tutto il borgo di teren scarpado metendoli una man di piere dentro via, e poi farli una corona di muro atorno atorno, e sarà alto di fuora piè 16, con el suo corador dentro per spaccio di 4 piè alto a le cime di le mure, et farà che inimici non porà piantar le sue bombarde che in tre luogi, el primo al monte di Zudei, et Dragocori et le Castrade, e in questo loco serado staria tutti i villani de l’ixola seradi con le sue vituarie, e li borgesani è in la terra di sopra si meteria da 4 in 5 milia valenti homeni. Voria el ponte stesse sempre in piè, et non lo butar zoso come si convegnirà far non fortifichando il Borgo, ma non era tempo, bisognava prima far le mure. Item, lì esser solum do bombardieri, voria fanti, et uno maistro di pozi acciò non fusse asediato di aqua, et li tornesi voria fusse di rame simplici, perché ogni 16 ducati di ditti tornesi lì a Corfù li spenderà per 100 ducati d’oro.

E da poi disnar fo collegio; et li savii si reduseno a consultar, et fo consejo di X simplice. Et consultando una materia, disse sier Ferigo Corner procurator savio dil consejo voleva, come una volta disse sier Andrea Vendramin fo doxe, pesse e vove.