1498 a dì 17 avosto in Modon. —
Copia di uno capitolo scrito per misier Nicolò da cha da Pesaro provedador di l’armada,
et ricevuto a dì 7 septembrio 1498.
A dì 6 de l’instante, nel far del dì, partendome da la terra de Metelin, zercha mia 6
luntam me scontrai in uno schierazo de turchi, armado, de portada di 300 e più botte, con
do coverte et anche el cassaro molto cavalcharoso, qual venia a vela con pocho vento. E
datoli lengua che ’l dovesse calare, come la raxon voleva dovesse far non essendo homeni
de mal afar, et tanto più quanto erano stà avertidi da una barcha de turchi quali se trovò
con el spectabile misier Lorenzo Loredam al partir suo da mi del nostro esser in quelle
aque, et che andavemo [1072] zerchando corsari et homeni di mal far, et che a li altri che
trovavemo a tutti fazevemo bona compagnia, et che i resposeno che non ariano paura de
10 galie, facendose quodammodo beffe. Subito mi fo apresso, senza calar né dir altro, trasseno
una gram quantità di freze, et ferite alguni homeni de la mia galia, e tra li altri el mio
comito nel petto, el qual la note seguente morite. Non contenti de questo, trasseno etiam
alguni colpi de bombarda, dei qual uno dete a prova de la mia galia et sfondrola tra la
zenta e ’l maier de sotto, et lì rimase la piera, la qual volze palmi 4 1/2 et pexa l. 85. Vistomi
far queste inzurie et ofese, fizi meter la galia in arme, et andai a investir, et comandai al
sibinzan, che era con mi, che investisse anche lui. El bon zenthilomo non li bastò l’animo,
in modo che io sola galia li potei far poco male. Pur combatessemo uno gram pezo, e tra
una parte e l’altra ne fo de feridi e morti. Da poi soprazonse misier Lorenzo Loredam che
havea mandato da la banda de la Natolia, insieme con la galia zaratina, il qual investì e
portosse el Loredam da valente sopracomito, feze quello a modo uno drago. Merita grandissima
comendation. Et combatessemo, oltra le prime bataglie li deti io galia solla, 4 hore.
Tandem, el prendessemo, e tutti tajadi a pezi et anegadi. Non è scapolado homo de loro, et
el navilio afondassemo. Ma avanti che ’l podessemo haver, fono morti da 18 homeni, de i
qual con el mio comito son 11 de la mia galia, e ’l resto tra Loredam e zaratin. E tra tutte 4
galie da 220 in 230 feridi, dei qual ne son de la mia galia 86, el forzo dei miei homeni da
capo, el mio armirajo pasado da una banda a l’altra una cossa da freza, uno mio nobele fiol
di misier Michiel Navajer, tutti i miei compagni de stendardo, 5 dei miei compagni da
l’alboro, e ’l resto tra balestrieri e galioti. E questo perché do fiade, come ho dito, me ho
tirado e afrontado galia solla, dinotandoli che, oltra el colpo di bombarda da prova, ne
hebbi uno a meza galia, et sfondome sotto la zenta a raxo aqua, che stitti in pericolo de
andar fondi, se non fosse stà le preste provixion le qual mi salvò. Oltra de questo, me dete
uno altro colpo di bombarda ne l’antena, et hamela scavazada, per modo che l’è convenuto
mandar la galia Basadona in Candia a tuor uno ventame. Tutti li nostri bombardieri in
queste 4 galie hano fato dal poco al niente, che a tante artelarie quante havemo e bote, i
dovevemo afondarli, e maxime le artelarie della mia galia. Ma ti prometto che tutti non
valeno l’aqua che i bevono, e questo proziede perché i son mal pagadi. Non si pol trovar
per el mal pagamento i [1073] coreno, homo che vaglia. El notificho a la Signoria, dichiarandoti
se non distruzevemo questo schierazo, l’haria fato di excessivi danni, e grami cui
fosse capità nelle man. Aveva a judicio mio da 250 homeni tutti de la capelina, che a
l’exercitio i fevano, erano valentissimi homeni, e la experientia el dimostra, che a distruzerlo
4 galie ha auto faticha. Abbiam trovado sopra 4 grossissime bombarde che traze piere
de l. 85 in 90, tre bote di freze etc. A tuo aviso etc.