Et fu astreto, che Francesco Morexini dotor electo orator a Napoli, dovesse in termene
di zorni 20 partirsi, sotto pena di ducati 500. Et questo fu facto perché vene lettere di Marin
Zorzi dotor orator nostro a Napoli, che significava di alcuni coloquii abuti con quel re don
Fedrigo, el qual si doleva di le operatione dil ducha di Milan verso la Signoria nostra, dal
qual haveva abuto tanto ben et era stà mantenuto et confirmato in stato. Et che soa majestà
si offeriva a unum vellem et unum nollem con la Signoria nostra, per le immortal ubligation
havia. Et par che in questi giorni era lì a Napoli venuto uno messo dil Turco, over dil bassà
di la Valona per nome dil Turcho, ben in hordine, a dimandar al re el corpo di Giem sultam
fratello di esso Signor turco che ivi a Napoli si ritrovava, et par che a Constantinopoli si
ritrovava uno orator dil papa che li offeriva di darlo.