A dì primo lujo, di domenega, hessendo in questa terra el conte Zorzi Zernovich, come
ho scripto di sopra con molti di la sua compagnia, et havendo usato a Ravena parole bestial;
etiam non hessendo in piacer al Signor turcho che questui da la Signoria nostra, che
era suo schiavo e rebello, fusse tanto honorato e datoli conduta, over per altra causa che fu
secreta; di ordine di capi dil consejo di X, in questo zorno, hessendo in palazo, fue per li
capitani nostri ritenuto et posto in la prexon di l’armamento. Et era cai dil consejo di X
Antonio Trum, Zuam Mocenigo et Alvise da Molin. Ma non fu butado collegio, ni altramente
examinato, se non che, 8 zorni da poi, chiamato el consejo di X con gran zonta, fu
divulgato era stà expedito, videlicet casso di la conduta; che ’l stagi in Toreselle ivi confinato
ad beneplacitum dil consejo di X, senza limitarli tempo alcuno. Et cussì fo posto.