Copia di una lettera venuta di Alexandria a dì 25 marzo, data a dì 30 decembrio,
drizata a domino Alovisio Arimondo olim consolo in Alexandria, copiosa di nuove.
Come vostra magnificentia dia haver sentito, essendo venuto el diodar nel Cajaro et
fatose forte in caxa sua con molte zente, più scharamuze fo facte con quelli dil castello, che
ogni dì ne moriva de una parte et l’altra. Tandem, ne la fin, el diodar hebbe una rota, per
modo che convene fuzir dal Cajaro, et andò a la volta de la Soria con zercha 800 mamaluchi
et arabi assai al suo comando. Se afermò a Gazara. Et li è stato capo de le zente dil signor
soldam, et sempre in tutte scaramuze Cartabei, el quale da poi ha governato el tutto et
governa fin questa hora. Ha cerchato de far molte provisiom da veder de mandar a cazar el
diodar de la Soria, tamen nulla è stà fatto, perché ne son de quelli che tira et de quelli che
molla. A la fin, per quanto sentimo, dicese el diodar esser intrà in Damasco, che [912] tegno
che ’l cercherà de farse signor di quella Soria se ’l porà, per poter poi meglio compir la
volontà sua. Avessemo de 10 dil passato dal Cajaro che el signor soldam havea vestito
Cartabei signor de Damasco, et Zambellat signor de Alepo, et facto capitanio de l’hoste
Campsum Alborz. Da poi etiam sentissemo che davano paga a’ mamaluchi per andar in
campo; ma che mamaluchi non voleva che Cartabei se partisse dal Cajaro. Et questa hoste
feva per mandar a meter questi signori in signoria, et per cazar el diodar. Non sentimo fin
qui altra mossa. Per zornata se intenderà la deliberation. L’amiragio grando Mirisbech
sentimo esser zonto nel Cajaro, per haver el signor soldam e quelli che governa mandato
per lui. Per quello intendemo, li è stà fato grande honor. Si dice per alcuni che Cansum
Cansumie adeso vegnirà fuora, et acertano che l’è vivo, ma che mai ha voluto ussir prima.
Per esser stà soldam, convegniva insir honorevolmente; poi perché ha auto più de tre mexi
mal de occhi. Non so quello dobiamo creder. Queste son parole che va atorno. Per zornata
se vederà. In questo mezo, mamaluchi fa di bruti scherzi per el Cajaro a’ zudei, e a’ cristiani,
et mori non ha per inconveniente de sacomanarli, et baterli et spogliarne qualche
uno; che altramente non pol esser, né non serà altro finché non se habi novo pastor. Carestia
per tutto, et piui al Cajero cha qui, et maxime de biave. Val el formento la ribeba qui
ducati 4 et al Cajero ducati 4 1/2. Quelli nostri che son al Cajaro, scrive che stentano haver
pan per li bazari. Non so dove sia processo, per esser pur stà questo anno bona saxon, se
non nasse da le gran biave che fece brusar el diodar al Sayto. Poi anche al Cajaro non osano
portar el pan in bazaro per dubito di mamaluchi. Non so se questa carestia chiamasse
qualche infirmità de morbo, benché non è troppo necesitosa. Misier Domenedio ne guardi.
Tegno queste cose soldanesche non arà così presto fine. El paexe in ogni modo patisse e
non pocho. Di qui pocho discomodo fin qui abbiamo de tal cose; ma dubitemo ben la Soria
non abbi di desconzi. Misier Domenedio, per sua clementia, a tutto provedi.
Avemo de 22 del passato dal Cajaro, che l’hoste se metteva in hordene. El signor soldam
have data la paga a cercha 2000 mamaluchi per andar in campo. Dice dovea partir
l’hoste fin 6 over 8 zorni, per quanto fin qui intendemo. Pur va Cartebei signor de Damasco
et i altri sopranominati. Non so come la cossa seguirà. In la Soria non mancherà di fastidii.
El catibisser era andato alla Mecha per esser morto [913] el signor della Mecha, e gran division
era tra’ suoi fioli, per veder di assestar le cosse, e metterne uno in signoria.
Aspetase al Cajaro una gram charavana che vien de Altor, con la qual se dice venirà
bona summa de specie. Et era zonti 6 navilii in Altor con specie, et altri 6 se aspetava. Si
rasona habbi a esser questo anno assaissime specie. Quanto sentirò più in particular, ne
darò noticia. Se questa guera dura niente in la Soria, el forzo di le specie vegnirà de qui: che
Dio lassi seguir il meglio.
Questi armiragii, zoè Cartabei e i altri deputadi andar con l’oste a Damasco, per quanto
sentimo, ha auto sospeto che andati che sarano fuora, el signor soldam non fazi vegnir al
Cajaro el diodar grando. Che per quello se vede, non havendo a romagnir lui in signoria, la
madre e lui voria se fesse soldam el diodar grando, perché già se dice che ’l diodar li havea
promesso di tuorla per mujer. Cartabei e i altri è andati dal soldam, et ali ditto questo. El
signor soldam, per quanto se afferma, li zurò su l’alcoram de mai non lo far vegnir, et
sempre atender a desfarlo. Per modo che questi armiragii se ne vanno a questa impresa. E
per tal sospeti, tegno habino fatto vegnir Mirisbech l’armirajo grando al Cajaro, azò romagni
in governo.
[1498 03 01]
A dì primo de l’instante, avessemo lettere dal Cajaro de 24 del passato, che già tute le
gente et el forzo de’ armiragii che vano con l’hoste erano fuori del Cajero. El zorno avanti
era ussito Zambellat et Cansum Alborz capitanio fuori, et l’altro zorno dapoi dovea ussir
Cartabei per l’ultimo. Tutti ussiti con gran magnificentie, et mostra andar volentieri a
questa impresa. Nel qual campo ne sono 2000 mamaluchi del soldam, et 1000 de quelli
armiragii, et arà bona summa de arabi. Son in questo campo 12 armiragii, 6 de 1000 lanze
et 6 di 40 lanze. Non so se ’l diodar aspeterà, benché pur presentimo che anche lui è grosso,
et da 3 in 4 milia persone e più; havea dato el guasto atorno Damasco, destruti zardini,
caxe etc.
Questo Mirisbech armiragio grando, a questi dì è stà vestito nel suo offitio con grandi
honori. Ha dato principio a far provision per la terra, et maxime de le biave ne feva vegnir,
et era zonto bona parte dal Sayto bona suma. Poi havea fatto aprir magazeni di piui persone,
per modo che in 5 over 6 zorni, de ducati 2 la ribeba, dicese esser venuto a uno, et che
ormai era abondantia de pan per el Cajaro, et che le botege era aperte, et che ognun feva i
fati soi; ma pur non manchava qualche [914] fastidio de zilebi. De morbo non ne era cosa
del mondo, anzi el Cajaro sanissimo de tal mali et de altri a par de altri anni. Et havemo
ancor aviso che Tangribardi havea letere de Damasco, fresche de 10 over 12 zorni, che
Damasco era resanato del tutto, et che non ne moriva piui alguno, ch’è cossa in verità che
molto ne piace. Cussì misier Domenedio conservi e guardi nui e lhoro. Era zonta al Cajero
la spada del signor de Tripoli, che era morto non se sa da che mal.
Cansum barba del soldam, fradel di la madre, che a li dì passati lo vestì diodar grando,
come per altre scrissi, l’à vestito etiam uzier et studar, et fasse grando. À fato uno matasebo
nel Cajaro terribile, che tutti quelli che trovano che abbi facto el pan meno del peso, li fa
forar le narixe del naxo et apicharli el pan, et mandalo poi cussì per la terra ... di baterlo poi
et manzarlo. Vostra magnificentia pol considerar etc. De qui perhò i formenti non fa mutatione,
et ancora sta su cercha ducati 4 la ribeba e qualche maidi manco; ma tegno vegnirà
adesso bona summa. Havemo letere de 3 de l’instante dal Cajaro del console de Damiata,
el qual ne scrive esser stà el signor soldam fino al Canico a veder levar l’oste, e poi era
venuto a la Chuba et lì stete zorni 4, et era intrato nel Cajaro quel zorno con gran triumpho
sotto una ombrella, et havea fatti lì di fuora conviti molti magnifici. Non so quello che
dobbiamo dir, se non star a veder etc. Se dice che il Cajaro era sanissimo. El campo se levò
dal Canico a dì 27 dil passato, et a parte a parte andava oltra, perché non hanno abondantia
di acque per camin. A l’intrar dil soldam in la terra, fu vestito che mai non fu in quel modo.
L’armirajo grando portò l’ombrella; vene sotto questa come faceva al padre.
Haveano da poi lettere dal Cajaro de 14 e del 16 de l’instante. Dice che era chavalchati
da 300 mamaluchi partesani del diodar grando, et voleva intrar in castello per tajar a pezi
chi li pareva suo’ contrarii. Fu rebatuti da quelli zilebi dil castello, et morti alguni, et alguni
prexi. Se dice el soldam haver confirmati tutti quelli che se trovò in questa baruffa, zoè di
questi 300. Nientedimeno, l’è opinione che questo soldam saria contento che ’l diodar
grando si fesse soldam piui presto che altri, non potendo regnar lui, che se ne dia ben acorzer.
Ma pur questi zilebi zercha de mantegnirlo, et bona parte de mamaluchi, perché
tutti son pieni de danari. Da poi la morte del signor soldam vechio, hanno auto 4 page
grosse, zoè da 100 et 200 ducati per uno per paga, oltra le page ordinarie. Tegnirano [915]
più duro che porano, perché, come i ne fa uno altro, le page non corerà cussì spesse, che
adesso ogni trato se lievano e dice che voleno danari. Ormai, li danari dia esser molto
smenuiti, et quanto entra, tutto subito esce. Le cosse è ancora sottosopra al Cajaro da poi
che l’è partito sto campo et Cartabei; ma mamaluchi sta molto dubiosi, perché dubitano
che ’l diodar grando non vegni al Cajaro, come l’arà sentito Cartebei et questo campo fuora.
Fanno ogni note la guarda per el Cajaro. L’armirajo grando governa insieme con Camsum
barba del soldam. Pur vien afirmato Cansum Camsumie esser vivo, et resona che fin pochi
zorni se aldirà cose nuove. E chi dice che per questa prima i farà Mirisbech soldam, poi
farà questo amico dicto di sopra. Vien ditto molte parole; ma credo chi ne crede saper piui
ne sapi manco, perché questi secreti die esser fra loro, et anche facilmente se mudano.
Aveano al Cajaro dil zonzer dil campo a Gazara. Staremo a veder. Idio lassi seguir el meglio;
ma se se troverano con el diodar, l’à a esser, per opinione de tutti, una gran tajata, et
quelli che romagnirà vincitori regnerà et assecterà le cosse a suo modo etc.
[1498 03 22]
A dì 22 de l’instante, vene comandamenti fusse liberati di castello tre armiragii che era
in prexon, uno di 1000 lanze, i altri do de 40 lanze. Et subito per questo armirajo fu liberati,
et sono andati al Cajaro, et partì a dì 24. Et per quello vien ditto, è stati etiam licentiati di
prexon et liberati alcuni altri armiragii e homeni da conto che era retenuti per esser partesani
del diodar. Se questo è, saria un stranio signal. Piui, che vien ditto che il diodam dia
venir al Cajaro in questo modo. Cartabei se aria lassà azontar de lassarse mandar fuora del
Cajaro, o veramente che tutti siano acordati, et che Cartabei se contenta de esser signor de
Damasco et non mollestar piui el diodar. Non potemo intender niente con verità. De
quanto per zornata seguirà, ne darò noticia a vostra magnificentia.
Havemo de’ 10 de l’instante, dal Cajaro, che l’era ussiti fuora tre armiragii che è da la
banda del diodar. Dicese esser stato l’armirajo grando che i à fatto ussir, perché vol veder
di pacifichar le cosse. Non se pol intender la verità, perché tutto quello fano, fano con arte.
Mostra voler far per un modo, et è per l’altro. Aspetavano qualche nova da Damasco, zoè
di campo, che poi tegno farano qualche deliberation. Pur resona che Cansum Camsomie è
vivo, et che aspeta el tempo. Non so quello dobiamo creder, non essendo venuto fuora fin
hora. Staremo a veder etc. In Alexandria, a dì 30 decembrio 1497.