A dì 18, per avisi abuti da mar, chome el Turco facea callafatar l’armata sua, e faceva
gran preparacion di armata, et si dubitava non volesse andar contra rodiani. Le qual nove
dete molto che pensar a’ nostri, maxime vedendo chome non era armata fuora, ma solum
galie ... in Levante et 4 in ponente a l’impresa de Pisa. Unde, fo terminato inter patres collegii
consultar questa materia et vegnir al pregadi con le sue opinione. Etiam, si aspetava lettere
da Constantinopoli di Andrea Griti patricio nostro era ivi marchadante, el qual advisava
spesso dil tutto la Signoria. Unde, pur fu decreto che Andrea Loredam capitanio di le nave,
et la barza patron Daniel Pasqualigo, che erano in Sicilia, da poi il mexe di april dovesseno
vegnir in Levante, acciò questa nave si potesse operar al bisogno.