A dì 14, da Costantinopoli.

Per uno gripo venuto di Corphù, se intese, per lettere di Alvise Sagudino secretario nostro de 17 setembrio, dil zonzer suo ivi, et conclusive nulla haver operato. Il Turcho non di buon animo, per esserli stà dito la Signoria trama paxe con il re de Franza per unirse e venirli adosso. Item, che uno zorno zonse, l’altro dì si apresentò a li bassà, el terzo ebbe audientia dil Signor et fo expedito. Et il Turco crede la Signoria sotto man dagi danari a quelli li fano guerra, quod est falso, et che l’aparechiava grossa armata verso Mar Mazor, perché gli era stà tolto Moncastro et Chiaveli et 4 altre terre sul Danubio, come ho scrito di sopra.

Item, esser stato ivi un gran terramoto che ha ruinato parte di la caxa dil Granturcho et tuta la seraja sua che tenia li puti, et morti quasi tutti li puti era dentro. El qual fo a dì ...

Praeterea, come el Signor andava in persona in campo contra vlachi, cerchassi et altri, et che ’l fa l’armada per mandarla in Mar Mazor, et che il Turcho tre volte sta da li diti roto. Le qual nuove tute fono optime a la cristianità.

Le qual letere zonse a Veniexia a dì 19 octubrio. Item, che ’l Signor havea licentiato da sì dicto nostro secretario, el qual si partiva mal contento per non aver nulla operato.