A dì 5 ditto, vene lettere di Alexandria, di 7 lujo, per via di Candia.

Narra el morbo esser per la Soria. Il diodar trovarsi al Sayto con 1000 arabi et tenia le vituarie non venisse al Cajero; et che al Cajero valeva il formento ducati 2 la kibeba. Che Campsom Campsomie, con altri assà armiragii et gran signori, erano scosi nel Cajaro; el soldam in castello, et che zilebi et cornassi erano con Campson, et che ’l soldam havia mandato per el diodar grando, el qual s’il veniva, saria grandissima tajata, come etiam si judichava la convegneria seguir. Che Zuam zerchasso barba dil soldam tramava di farsi armirajo grando et far Campsom soldam, et che ’l soldam havia mandato a far netar le prexon di Alexandria per mandar Temeres et alcuni altri signori.