A dì 20 ditto, vene lettere di Alexandria di 17 mazo, et el capitolo di una lettera qui sarà scripto per intender il successo di quelle cosse, maxime dil soldam et di Campsom Campsomie. Copia di uno capitolo di lettera di Alexandria de 17 mazo, ricevuta per via di Candia qui a Veniexia a dì 20 lujo.
Avemo, per via del Cajero, inteso come el morbo era zonto a Gazara, nel qual luogo facea gran processo. De la Soria non habiamo altro zà molti zorni, e questo proziede per esser le strade rote. Tamen, judichemo el sia etiam per tutta la Soria, che Idio non el prometi. Non credemo per questa muda l’abi ad esser de qui, ma ben potria seguir uno altro anno el fesse processo in questo loco. De le cosse del Cajero, intendemo quelle esser in più garbugio che mai. Et questo perché li mamaluchi fra loro sono in grandissima division e discordia per la venuta di questo diodar nel Cajero, el qual, havendo ultimamente inteligentia con molti signori del Cajero de voller secretamente far morir el signor soldam e lui farse soldam, et con mezo de certo schiavo tramò di voler far morir con tosego el fradelo de la madre del soldam ch’è miracul, azoché poi più abelmente potesse mandar el desiderio suo ad execution. Ma el par che questo venisse ad orechie al dito miracul, et fece a saperlo al signor soldam, el qual subito fece far le cride che tutti quelli erano da la parte sua dovesseno [692] montar in castello. Per la qual crida, molti signori se reduseno, excepto che ’l diodar, Tanibech Chara, et doi altri. Et visto questo mamaluchi che ’l diodar non era venuto, corsero a caxa sua, et fono a le man con lui et sui mamaluchi, per modo che de l’una e l’altra parte ne fono morti assai. Tandem, el diodar, insieme con Tanibech Chara, el signor de Gazara, de Tripoli, et Zenon che era amirajo de mille lanze, con molti mamaluchi che erano insieme lì fono forzo de fuzir dil Cajero, et sono andati a la volta del Saito, per modo che ’l Cajero è restato destruto. El signor soldam par che dapoi questo habbi mandà salvo conduto a Cartabei, che si atrova a Gazara, et li altri signori che sono ne la Soria, che seguramente posino tornar al Cajero, perché sarano benissimo visti et tornati a li lochi soi. Non sapemo quello succederà. Che Idio prometi il piui bene de’ cristiani. Et è da saper, che Campsom Campsomie non è nominato. Chi tien chi ’l sia stà morto, et chi dice che l’è vivo. Altri diceva, maxime alexandrini, che l’era a Damasco in castello col signor. Ma, per lettere di 6 mazo di Beneto Sanudo consolo a Damasco et de altri merchadanti, nulla si sentiva che vi fusse; ma ben che le strade erano rotte; saria poche specie; et dubitavano di morbo per essere circumcirca. Tamen, per esser il tempo propinquo a l’intrar dil sol in lion, ch’è a dì 15 lujo, nel qual tempo in la Soria statim quel zorno cessa il morbo, et non solum non se muor più, ma etiam li amallati variseno etc. le galie di Levante in questi giorni andono a lhoro viazo. Copia de una lettera venuta di Alexandria de dì 16 mazo 1497, che trata di le novità dil Cajaro, scrita per il capelan dil consolo a domino Alovisio Arimondo che ivi fu consolo. Havemo a questi dì dal Cajaro, che mamaluchi e zilebi ha pur mal cuor contra questo diodar, per esser stà cajom di la morte de molti signori et homeni de conto. Par, per quello vien dicto, che vedendosi odiado, habi zerchà pur di farsi forte, et ha da lui el Temeres et Tanibech Chara, e signor de Gazara ch’è al Cairo. Vien dicto che andando al castelo fo asaltado da molti zilebi. Chi dice che l’è morto; chi dice ch’è fuzito; et chi ch’è prexo. Non podemo intender la verità; ma novità è in ogni modo, et alguni dice che l’è fato forte in caxa, et che l’à mandà per molti arabi. Non se puol ancora intender la verità. Se dicono ancora che dia tornar [693] in prexon qui Temeres et Tanibech Cara. Non potemo saper niuna certeza ancora sto Casum Casummie si è ancora vivo o morto, et anche la brigata non ossa parlar, et la brigata sta molto suspesa. Al Cajaro in ogni modo le cose non son pacifice. Non so che fine harano. Potria esser se se cavase ancora costoro di ochii. Et essendo morto quel amigo, facilmente potria regnar per zilebi et mamaluchi. Ha quel che voleno da lui. Et quanto seguirà, per mie per zornata, vostra magnificentia saprà. Da poi scrita, habiamo inteso questa novità più distintamente et con più verità. Non restarò de dir quanto sento a vostra magnificentia. Par che a questi, el signor diodar grando, havea per contrario uno signor chiamato Cartabei che fo zerman del signor soldam pasato, che al presente è miracul, per adimpir forsi qualche suo pensier, tegnise modo da prometer certe quantità di danari a uno fidato di questo signor Cartabei dandoli una parte di danari, che si dice la promision fo di duc. 1000 et deteli duc. 400 avanti trato, etiam el tosego che atosigase dicto suo patron. Et lui, come fidato, manifestò questo al suo patron, el qual li dete duc. 600 de subito, et disse de mostrar haverlo facto. Et subito dicto Cartabei se mostrò di amalato, lamentandosi et mostrando di star male, con pensier, per quello se puol creder et che anche se dice, de pigliar el diodar quando fosse venuto a visitarlo. Et per quel zorno non andò, forsi anche per qualche sospeto. La nocte poi, dicto signor Cartabei secretamente andò dal signor soldam et disili la cossa. Par che ’l diodar el sapesse, et andò l’altro zorno al castel per far suo scuxa, et cavalchò con lui el signor Tanibech Cara, el signor de Gazara, el signor de Tripoli che se atrovò li, et uno armiraglio chiamato Zenen, et uno altro chiamato Corcoman fato nuovamente pur de mille lanze, tuto suo. Et come fu al castello, non volse che costor montasse, et montò el diodar sollo. Le parole usate per el signor soldam se pol comprender, lui excusandose etc. Vegnando zoxo, fo molte parole grose con questo signor Cartabei miracul, in modo che disse: «Non voglio più montar in questo castelo.» De lì a zorni do, par che ’l signor soldam mandase per lui, et che mandase el machilizech. Et essendo lì el signor de Gazara, fu a parole con questo machilizech, per modo che li dete de un pugno sul muxo. El dicto machilizech montò in castello cussì sanguinato, per modo che molti zilebi se messe in ordene, et vene zoso per vegnir a la volta de la caxa del diodar. El diodar et tuti li sopradicti, cavalchò et passò el fiume. Chi dice che son andati a la volta de [694] Sayto, et chi dice che son pocho lonzi et ha mandato per 6 over 7 milia arabi. El signor Temeres se atrovò in castello et lì fo retenuto. Siché un’altra barufa è in campo. Chi dice etiam che el signor soldam ha scrito a Cartabei capitanio di bairi che se atrova a Gazara con quelli altri armiragi che vegni al Cajaro, che tegno che non se fiderà. Se Casum Casunmie sarà vivo, tegno che adesso se intenderà subito. Poi el signor soldam feze levar la bandiera in castelo, et intrò tuti li armiragii de 10 e 40 lanze, et tutti quelli che haveano zemechia dal soldam, siché, fin qui tanto sentimo, me par le cosse più imbratà che mai. Non so quello che sarà. Ognium dice che, da poi ramanda, à esser gran cosse. Dubito non nuoxa a le merchadantie, zoè al vegnir de le zipene; ma tegno queli da Damasco non sarà pezo de nui. Sento per questi nostri che, se arà a vegnir ambasador di qui, ne arà bona parte la magnificentia di misier Piero Balbi nostro, che prego Dio sia in nostro tempo, che ne aria grandissima consolation. Non so se sua magnificencia vegnisse. Dio fazi quello sia per lo meglio etc. A dì 16 mazo 1497 in Alexandria. presbiter FRANCISCUS capellanus et cancellarius dominorum venetorum Alexandriae.