A dì 27, vene uno messo dal Cajaro con nuove, per quanto se divulgava, che ’l signor soldam era dismontato del castello con assai zilebi, et andato a trovar a la Bischia Campsom Campsomie et li altri armiragii, et quelli havea morti, et presi alcuni di lhoro; et Campsom era fugito; et fato comandamento che conzasseno li fontegi; et fo vastata la terra.

Tamen, da poi intendessemo la cossa non esser cussì; ma che intendendo el signor Campsom che se preparaveno per venir zoso dil castelo, diliberò, lui et li altri signori erano con lui, non se lassar trovar a la streta. Et inanti che dismontasseno zoso del castello, se levò et ussite dil Cajaro, et andavano a la volta di Canito, non però fuzendo. Sentito questo, el signor soldam non vene zoso; ma molti zilebi veneno zoso et andono a la Bischia, e li brusò feni, stale e caxe. El signor Campsom et li altri signori, per quelo se intende, sono reduti al Canico, mia 12 di nostri lontan dal Cajaro, che zè a la volta de Damasco. Credo non habbi troppo zente. Et cussì al presente hè in questi termeni mal siguro el paexe, et maxime a quella volta per zornata se anderà sentendo el processo, et per mia darovi noticia etc. A dì 16 marzo, vene nuova da qui, che, cavalchando Campsom Campsomie a la volta de Damasco con quelli altri signori con cercha cavali 500, et unde andavano, né con che pensier non se intende; ma fo asaltato dal diodar grando el qual havea più de 2000 arabi, et furono a le mani, et dicono nel facto d’arme fo morto ditto Campsom et alguni altri armiragii, e ’l resto presi e morti. Et chi dice non esser vero; tamen, per la venuta de’ nostri dal Cajaro, che fo a dì 11 dicto, dicono che vien ditto pur esser stà morto ditto Campsom et qualche altro armiragio, e ’l resto presi. Et che haveano vestita la terra, et de zorno in zorno se aspectava el diodar grando, et che ancora alcuni stava dubiosi el fose el vero. Se questo è, serà stà un gran miracolo che se habi messo andar in quelle parte cussì debile, sapendo el diodar grando era vivo. Dice che, come el diodar grando sentì che Campsom era mosso per farse soldam, era in la Soria, e se redusse a Tripoli [639] per montar su qualche nave et fuzir via. È stata una cossa grandissima et quasi miraculosa che, havendo habuto questo Campsom el favor de tutti li signori et di bona parte dil castello, pochi l’habbi cussì rebatuto. Per tutti nel Chajaro vegniva dicto se faria soldam, et vien ditto fino a hora che se l’è vivo, serà soldam. Se Campsom sarà morto, sarà finita bona parte di la guerra. Se l’è vivo, el paexe non hè per esser sì presto in pace: imo se ’l fusse morto e quelli altri signori non sia stà presi, le cosse non starà in paxe. Del diodar grando nulla sentimo del suo zonzer. Havemo ultimamente, da poi el zonzer di nostri dal Cajaro de 10 de l’instante, che il zorno avanti, che fo a dì 9, era zonta la testa de ditto Campsom Campsomie con 34 altre teste, tra de armiragii de 1000 lanze et altri armiragii e homeni de conto. Et quella de Campsom have apichata a la porta de Belzueli con certe altre. Le altre sparse per la terra. Vien dicto che ’l forno rotto dal signor de Gaza e da Tripuli, e che ’l diodar grando stava serà in una terra. Per quel sentimo, non era con Campsom e li altri armiragii salvo cavali 500, et colori erano più di 2000 cavali de arabi, siché tegno sia stà un miracolo e per il meglio a tanti disegni che feva quel Campsom. E dice che ogniun al Cajero sta molto sospeso, perché l’avea pur di partesani, et poi si vede la terra spojada de signori, né non zè da farne che siano homeni da conto né atti a le arme, siché il paexe sta malissimo, spogliati de capi e de zente. Dicono esser stà presi do armiragii de 1000 lanze e altri assai, zoè Caumbei capitano del Baere et Zambelat. Forsi adesso cesserà le cosse; che Idio voglii, et lasi seguir il meglio. Data in Alexandria a dì ... marzo 1497, scrita per il capelan dil consolo a domino Alovisio Arimondo, olim consolo stato in Alexandria.