Copia di una lettera di Candia, di sier Zuan Bragadin di sier Zuan Francesco, data a dì 3 Novembrio 1522, drizata e sier Zacharia Trivixan so cugnado.

Come, per due galie zonte heri da Nichsia si ha, per lettere da Palamesa, come a li 17 dil passato il Turcho dete una bataglia a Rhodi, dove non li potè far nulla. El qual se haveva deliberato de partirse. Ne la qual bataglia fu preso per uno albanese, che era in Rhodi, una imbrazadura dorata tolta per el dito albanese a uno turcho combattendo, dil che uno rodioto la voleva, el dito albanese non ge la voleva dar, et veneno in parole per modo che 'l rodioto ge dete uno schiafo, et li tolse la imbrazadura. Per il che l’albanese se n’è fuzito in campo dil Turcho, et referite al Signor come Rhodi era forte da ogni banda, solamente da la banda di la Zuecha, et che li era pochi homini dentro, et che ’I non si dovesse levar, in modo che ’l Signor, preparato un’altra bataglia cum mine da dita banda de la Zuecha, et a li 24 del passato ge la dette zeneralissima cum mine et fuogi per muodo che ne sono morti assai si di dentro come di fuora, et non ha fatto altro; ma se ha deliberato star questa invernata li, el ha partito l’armada in tre parte, una ha mandato al Fischo, l’altra a Carchi et l’altra al Tiro, Sichè si ha deliberato di assediarlo per esser pochi homini dentro. Altro non si ha al presente. In questa hora si parte la galia Dandola con le letere.