Copia di una letera scrita da Nixia per il magnifico duca di l’Arcipielago a sier Zuan Alvise Pixani suo cugnado, sotto a dì Zugno 1522.
Non resteremo dar aviso a la magnificentia vostra quanto havemo da novo a la tornata dil brigantin mandato a Syo, essendo qui vostra magnificentia, notificandoli come le letere havemo habudo di missier Bortolo Zustignan non volse scriver precixe le nove dubitando de li inconvenienti, solo a bocha se messe il patron de referirme come infalanter erano in ordine per ussir a li Castelli vele numero 250 tra picole e grande, et el Signor turco steva per cavalchar con lo exercito in Natalia, el vulgo é per Rodi, et era zonto a Syo velle 17, che aspetava l’ armata. Altro non disse da Syo. Praeterea, questa matina è ritornà da Rodi lo nostro gripo patron Nicolò Robali, quali dize come a Flisco zonse lo exercito dil Signor Turcho; la quantità non sa, e fu mandato da Rodi una fusta in terra ferma per certi segnati consueti, e suso la fusta era uno Antonio Giaxi homo praticho adoperato per Turchia. Et ditta fusta zonta che fu li, ove era l’segnali, trovò alcuni turchi merchadanti con altri turchi, et rechiedeteno che Antonio dovesse ussir de la fusta per parlar con loro. Et cussi feze, et li turchi fexeno intrar in la fusta doi de 1 soi turchi, et de presente che Antonio ussite, li turchi comenzono a sagitar la fusta, in modo che preseno Antonio, et li dui turchi che erano in fusta l’uno se gitò in mare, l’ altro fo retenuto e conduto a Rodi e confessà come de certo l’ armata va a Rodi. Et questi de Rodi hanno auto gran dispiacer del perder de Antonio, perché confesserà ogni cossa de Rodi, per esser praticho et adoperato in tutte le cosse de Rodi. Dio aiuti li Cristiani, el a nui che semo sui vixini.