Dil dito, di 3.

Come per le altre scrisse, il Signor, inteso li danni fati per il bassà di Bossina, lo dismesse e fece venir di qui in . . . e li vayvoda in cadene, mandando di li un zaus a far processi e restituir il tutto; il qual va da olaco, sarà ... in zorni 15, parli a di 20 dil pasato; li de' letere al rector di Sibinico et Zara mandaseno da lui non andando fino li a chiarir li danni fati. Ha posto il Signor in loco suo sanzacho di Bossina il sanzaco di Scutari, chiamato Alibeì.

A di 23, zonse il schiavo stato orator a la Signoria nostra, dete le letere a li do bassa, et quella al Signor li fo portata e la lexe; sichè, per quel ha inteso, si aquietò soa excellentia e li bassà zerca le fuste di Coron, et pur dicono mancarli assa' roba, come apar per uno inventario, oltra quello li è stà consegnado, et voleano mandar per questo uno zaus a la Signoria; et manda dito inventario aziò si vedi di recuperar, sicome li bassà li hanno ditto voleno al tutto sia restituita la roba manca.

Scrive, esser venuti di Soria do olachi, a dì 26, con la nova di la rota data al Gazelli, al Cabon, et portono la testa al Signor con altre teste di certi capitani; unde lui Baylo andò da li bassà alegrandosi di tal vitoria, e tanto più che molti voleano andar volentieri a portar tal nova, per esser fama la Signoria aver ben tratato questo schiavo; unde lui Baylo ha dessuaso il mandar per questa poca vitoria.

Scrive non ha danari e si provedi per esser povero, e non sa il modo; oltra il conto mandato, resta aver ducati 1200. Ha trato do letere di cambio: una di ducati 200 in sier Lorenzo Capelo e Boli, e una di ducati 300 in sier Lorenzo Falier e fradelli, però prega siano satisfate; e sopra questo scrive longamente. Item, desidera saper la eletion dil successor.

Scrive a la fin è zonto il schiavo andava in Barberia, fu preso da le nostre galìe, qual è stato da li bassà e fato gran querele; unde fo mandato per lui Baylo, e Peri bassà li usò gran parole, dicendo volea el fosse satisfato di quello mancava, e si farà pagar sora do lui. E li rispose non si poteva trovar il tutto; et che quando si fa danni a' nostri, etiam loro dicono si fara restituir quello si potrà trovar; et parlò molto contra dito schiavo, dicendo era stà causa di ogni mal sequito.

Hor Peri bassà, che era a caxa soa, li mandò fuora, dicendo si aspeterà che zonzi il nostro Orator.