Di Corfu, fo leto una letera di sier Bernardo Soranzo baylo, di 15 Zener.

Avisa di quelle occorentie, et manda una relation di uno vien di Negroponte, la copia sara qui avanti. Manda la copia di una letera li ha scrito l'ambasador dil Turco da la Valona da poi recevute le robe di le fuste li portò quel citadin di Corphù, el li manda uno inventario sotoscrito per lui el per lo Emin di quello ha ricevuto; ma manda uno altro inventario per il qual dimanda li sia mandato assa' altre cosse erano su ditte fuste per assa' valuta, et 16 schiavi compradi per Sinan rais, dicendo in la letera: “Si mi non mandarè a la Porta tutte dite robe, faremo retenir a Constantinopoli il vostro Baylo, et il Signor vora sia satisfato dil tutto” con altre parole.