Di Anglia, dil Surian orator nostro, date a Londra a dì 28 Novembrio.
Come ricevete nostre letere con li sumari dil zonzer di l'orator dil Turco per confirmar la paxe, e in eletion fata di l'orator Minio al dito Signor, et la Letera drizata al reverendissimo Cardenal, ringratiatoria dil bon ofìcio fato per la Signoria nostra. Unde andò dal prefato Cardenal, e li comunicò dite nove. Disse, questo Signor ha anni 25, è di bona prudentia, saria da temer non fosse come il padre; poi li dè la letera di la Signoria con parole acomodate. Quella leta, ringratiò la Signoria offerendosi etc. Poi disse, aver il Papa voi sguizari per la impresa di Ferara, et che il re di Franza, nì la Signoria nostra doveva soportar, ni etiam el suo Re li piace per esser di nominati per dita Maestà in la liga et paxe con Franza fata; et che l'ha scrito al Papa, con altre parole indicative la mala contenteza di questo. Poi li disse, tien il re Cristianissimo non verà in Italia, et che la Cesarea Majestà, fato le visite con il serenissimo re di Hongaria et Polonia et lo illustrissimo Infante suo fradelo nel qual è maridata madama Anna sorela dil re di Hongaria, le qual viste sarano a meza Quaresema, manderà in Spagna per cessar quelli tumulti, e lasserà vicario imperial dito Infante, perchè cussi è contento il ducha di Saxonia al qual pareva convenisse questo cargo. Poi disse, che 'I conte Cristoforo veniva in Friul al governo di quelli lochi mandato a requisition dil cardenal Curzense ch' è suo cugnato, zoè di Maran et Gradischa, che sono di la Signoria nostra.