Et poi, sier Luca Trun vicedoxe si levò suso et fe la relation di quanto havia exposto domino Filipo More orator dil serenissimo re di Hongaria, di l'amor e amicitia di quel Re con la Signoria nostra, et che da poi la creation di questo novo Signor turco, l'avia mandato suo nontio dal suo Re a dimandarli el continuar in la paxe, et che 'I suo Re non havia voluto risponderli se prima non partecipava con questa Signoria, I' interesso de la qual è comun con quello di Soa Maestà, perchè confinamo col Turco; et saper etiam la voluntà del Pontefice, perchè adesso saria il tempo di far facende contra questa caxa et se el signor Selim viveva, la christianità saria stà opressa da lui; e sopra questo fece una oration latina molto dotta contra turchi. Li fo risposto, che 'I vedemo volentiera; con altre simile parole. Poi el disse, una altra volta diria altre cosse; et cussi, da poi ritornato in Colegio, disse come il Re avia inteso la eletion di domino Marco Minio orator al Signor turco per far la pace, però il Re suo desiderava fusse etiam tratà che 'I sia dentro tal paxe. Poi esso vicedoxe disse li Savii veri a questo Consejo con le soe opinion per farli la risposta, come è ben conveniente.