Da Napoli, di Lunardo Anselmo consolo nostro, di 16.
Come è letere di Alexandria di sier Tomaxo Contarini di 29 Octubrio al Conseio di X. Scrive, il Signor turcho prospera, à auto la Soria, et era in Jerusalem, e il campo suo venuto a Gazaria fa optima ciera a cristiani e zudei, non perseguita altro che mamaluchi, li qual li voi fenir e amaza fino li fioli in cuna.
Item, ha donado d' intrada a li frati dil Santo Sepulcro ducati 500, e donde li pelegrini pagavano ducati 13 per uno, vol pagino solum aspri 5 por uno; et come el veniva a la volta dil Cayro. Scrive, al Cayro era stà fato soldan il Diodar grando, e feva exercito contra il Turcho.
Item, come l'armata dil Soldan avea roto l'armada di Portogallo, et preso do castelli nell' lndia avevano fato ditti portogalesi. Scrive poi deto Consolo zerca il suo chanonicato di Padoa: come vien molestato a torto da chi ha comprà tal lite contra di lui a Roma, e sa ben domino Zorzi Pixani la cossa e li soi meriti non lo richiede questo; e però si ricomanda a la Signoria Nostra non li sia fato torto.