Fu posto per li Savii tutti, atento il bisogno di le zurme per lo armar, che li Provedadori sora l’ armar possino asolvere i banditi ad tempus di le terre e lochi nostri da inar e da terra dando homeni su l’ armata, sicome parerà in Quaranta criminal, sicome fevano li Savii sora le aque che li asolvevano dando danari, etc. Et sier Gasparo Malipiero governador di l’intrade et provedador sora le aque, andò in renga e contradise, dicendo che questo è ruinar l’oficio di le aque, persuadendo a non voler le parte, e che si havera adesso assà zurme in Dalmata chi li vorà dar danari. Et poi andò in renga sier Filippo Capelo qu. sier Lorenzo, vien in pregadi per danari, dicendo è da far grande provision, et che l' Signor turcho manda certissimo questo anno armada fuora, sicome per più letere li ha scrito sier Zuane suo fratello, qual è a Costantinopoli, scrivendo non si mandi stagni a Costantinopoli perchè fanno artellarie, etc. Fo longo et parlò ben. Andò la parte; fu presa di largo. 126, 49, 3.