Da Constantinopoli, fo letere di sier Tomà Contarini baylo, di 30 Septembrio, et di sier Marco Minio orator nostro, di 27 et 29.

In conclusion scrive e l'uno e I' altro separatamente, dil zonzer dil ditto Orator nostro li, a dì 27, con do galie, zoè sier Alvise Michiel et sier Nicolò Donado, e licentiò il Michiel, et che li fo mandato contra il Subassi, et ut in litteris, zoè che li mandò contra per il locotenente dil Signor, è lì, una fusta e lo conduse a la stantia deputatoli honorevolmente. Fu presentato di vitualie al solito et destinatoli ducati 6 al zorno per spese. Il seguente giorno fu a visitation dil prefato Locotenente, dal qual fu ben visto et aceptato. Et come il Signor era in camino per ritornar in Constantinopoli, et era stà subito spazà a ditto Signor letere con avisarli la venuta dil prefato Orator, et quello el comandava etc.