Di sier Marco Minio, va orator al Signor turco, date a Corfù, a dì 4 Lujo.

Come ha inteso la morte dil Serenissimo Principe, la qual sarà disturbo per le letere l’ha in suo nome, però bisogna rinovarle el mandargele per via di Ragusi, le habbi zonto el sii a Costantinopoli.

Scrive, esser stato a Cataro, tolto informazion etc. È discordia tra quelli zentilhomeni e popolo; ha zerchà acquietarli. Scrive parole disse uno turcho era lì, come l’andava a Costantinopoli, el Signor era in qua, andato a la impresa di Hongaria. Li fo risposto de Costantinopoli anderia in campo a trovar el Signor. Disse lui: "lui venitiani se’ fedeli, vui volete star a veder quello seguirà de l’ impresa."

Prima scrive fo a Budua e quel podestà sier Marin Falier ha fato processo. Buduani si portano mal e vicinano mal con turchi, imo venendo in Budua alcun turco, li aspeta di fuora e li amazono nel suo ritorno, tamen l’andata sua de lì è sta de ben assai etc.