Fu poi leto do capitoli di letere di sier Marco Minio, va orator al Signor turco, una data a Puola, zercha l’orator di Napoli di Romania voria si dimandasse li confini, che saria alterar il Signor; l’altra di 25, di Ragusi, zercha si ’l dia andar in campo dii Signor andando a la impresa de Hongaria, come ho scripto. Fu posto, per li Savii tutti, scriver al ditto Orator nostro vadi temporizando per l’Arzipielago, et intendendo di Signor sia andato a la impresa ut supra, vadi a Constantinopoli, si fazi amalato con farsi portar in sbara, et si fosse instado andar dal Signor, si scusi, in fin non potendo far di men vadi; e per niun modo smonti a Eno; con altre parole, e leta la letera la brusi.

Item, una altra letera, zercha li confini di Napoli di Romania, destro modo licenzi quel orator, per non esser di parlarne di questo. Andò dita letera. Ave 185 di si, 5 di no, fu presa et espedita, el fo comanda grandissima credenza e sagramenta el Consejo.