La matina gionse a Lio, Tagavardin, orator dil soldan, con zercha persone . . . ., et Alvise di Piero, stato cogitor con Alvise Sagudino, secretario nostro, che li al Chajaro morite; et vene con la galia, soracomito sier Francesco Pasqualigo quondam sier Cosma. Et inteso questo, la Signoria comandò a li zentilomeni deputati dovessono andar vestiti di scarlato fino a Lio a riceverlo, et insieme con la galia condurlo a la Zudecha, a la stantia deputata, in cha’ dil quondam sier Marco Pasqualigo, et cussì andono zerchi . . . zenthilomeni, la più parte mercadanti damaschini et alexandrini. Et cussì zonti, lo acetono, e con la galia medema, montati suso, veneno per canal grando fino a la riva, dove dismontoe. La caxa era preparata honoratamente, e con coltra d’oro; et li fo dato il felze d’oro su la barcha, e datoli barche, et fatoli le spexe a conto di cotimo. È da notar, dito orator è venuto qui a spexe di cotimo di Alexandria, come ho notato di sopra. El qual Tagaverdin è yspano, homo fedolo et cativo et di gran inzegno, di anni . . . ., et turziman dil soldan e armirajo di 40 lanze. Si dolse, la Signoria non li era venuto contra il bucintoro; et più, che la sera li fo dato da manzar im piere (sic) etc.