Dil capitano zeneral da mar, di 6 date al Prodano in galia
Come era lì venuto con l’armata dove era le nave et le galie grosse, mia 18 lontan da Modom per far consulto, et reiterar l’ordine dato de investir l’armada turchescha, qual è pur in Portolongo, et era di pensar havesse scritto al Signor turcho; et che il zorno feva provenze, et la note non ussiria; siché esso capitano disse farà cossa sarà di honor di la Signoria nostra.
Item, quel zorno era zonta ivi la galia grossa Morexina, et la nave patrom Martin da Cherso, et un barzoto siciliano cargo de formenti, qual à fato armar.
Item, à scritto a Corphù a sier Andrea Loredan provedador che, venendo esso provedador con 10 gripi in armada, mandi 4 gripi con 300 fanti a Nepanto et li altri 6 meni in armada, et cussì ogni altro navilio potesse haver.
Item, dice si ’l campo va senza bombarde a Nepanto nulla farà, perhò che le bombarde de’ turchi sono su l’armada, et quelli di Nepanto si difenderà virilmente.
Item, mandoe do copie di lettere,una del provedador di Nepanto, di do, et una di sier Francesco Zigogna provedador, di 4, et à fatto la descrition, è in Nepanto persone 3500, zoè homeni da fati.
Item, aricorda sia mandà biscoti.