Fo messo parte, per li savii dil consejo e di terra ferma, di scriver a li oratori nostri in Franza do lettere, per una fata, data a dì 20, avisar dil zonzer qui dil ducha di Ferrara, l’altra di la publication di la liga con gran triumpho presente el ducha e li oratori, et darli aviso di le cosse e nove dil Turcho, et che presto si saperà il vero per l’orator nostro qual zà dia esser zonto, et che sia dato a li do oratori licentia di venir via. Et sier Antonio Loredam resti ivi, et sier Polo Barbo et sier Marco Antonio Morexini el cavalier consejeri voleano seguir come el facea grande armata. Or fo gran disputation. Parloe sier Beneto Trivixan el cavalier contra tute do le parte, poi sier Marco Antonio Morexini el cavalier, qual tolse la volta a sier Zuam Morexini savio dil consejo, poi sier Antonio Grimani procurator contra tute do le parte, dicendo: scrivendo si voleva disfar la liga, poi parlò sier Polo Pixani el cavalier savio a terra ferma; et andate le parte 3 non sincere, 28 di no, 16 di do consejeri, 150 di li savii, et fu presa: et cussì fo terminato e preso mandar li sumarii di le nove dil Turcho. Item, fo posto, per tutte le tre man de savii, di scriver a li proveditori di l’armata, che habino vigilantia, et bisognando possino retenir navilii e nave; et in conformità sia scripto in Cypro, in Candia et a Modon retegni navilii et fazino provisione, et questa parte have tuto il consejo. E questa sera partì il primo arsil per Candia, patron Tomaso Negro, et fo mandà le lettere. Item, fo posto, per li savii ai ordeni, eramo solum 4, che a li patroni di le galie di Barbaria, atento le cosse successe qual non erano partite, che la muda li sia perlongata per tutto il mexe di zugno; have 11 di no et 160 di la parte e fu presa. Et restò consejo di X a far li soi capi, quali fono sier Cosma Pasqualigo, sier Francesco Mocenigo et sier Piero Balbi.