Quivi è il sumario di la relatione fata per Alvixe Sagudino secretario di la illustrissima Signoria, ritornato da Costantinopoli.

Primo, che el Signor turcho era de etade de anni 56, de color zalo et più presto livido, amador de paxe; dedito più presto a la golla et altre voluptà, che a la guerra. Che de presente, l’à tre bassà, videlicet Thaut bassà ch’è albanese, Imbrai bassà et Alì bassà che sono turchi. Et che el superior tempo, Scander bassà, che era de mazor auctorità de tuti questi, è stà privato de questo officio et dignità.

Che l’à 7 fioli, el mazor dei qual è de età de anni ... el menor de anni 12. El terzo ch’è di età di anni 21, sta a le Foje, ha mazor parte a sucieder ne la signoria del padre et da li popoli, perché li altri stanno in paexi lontani et questo sta apresso la Porta; el perché, morto Mahumeth, questo terzo fiol fu messo a sentar per Signor in Constantinopoli essendo suo padre fuora dil paexe, et venuto suo padre, el ge rese el dominio et la signoria.

Item, l’à 8 fiole tutte maridade, et hora à la dona graveda. Che l’à de intrada 2 milioni et 400 milia ducati a l’anno, a questo modo: de el charazo ducati 900 milia; del terzo del charazo ducati 300 milia; de tute le sue scalosie ducati 500 milia; del dazio dei castroni ducati 400 milia; de algune donne ducati 300 milia. La qual intrada e lo spende ogni anno integralmente, et fin qui l’à descavedado del deposito che lassò suo padre, che era 6 milioni ducati, 3 milioni, per quanto se divulga. Che ne la Grecia à 28 capitani, et 34 ne la Natolia, che sono in tutto 62, che hano soto de sì 32 milia persone, che non hano altro stipendio che le decime dei paexi, et sono obligati a servir el suo Signor de qualunque guerra, senza altro pagamento. Et queste zente se dimanda ...

Item, l’à i gianizari, che sono 8000. Item, li bassà et altri primi sono fra tuti loro 8000 cavali, che tuti sono obligadi a servir il Signor. Li gianizari, per li suo’ stipendii ordinarii, et le altre fameje per le provision che à li suo’ primi bassà et signori, ne le qual he compreso i suo’ stipendii. Che sempre che il campo dil Turcho se move, lo ’l seguita alcuni che chiamano coradori, che servono senza stipendio, ma solum per aver causa de poder andar in guadagno a la strada et a robar, et questi coradori sono da 15 milia in suso. Che per li suo’ stipendii ordinarii, sempre che il Signor voglii far zente, el ne ha quanto el vole, fin a la summa di 100 milia, oltra quelli che ho numerado. Che tra Galipoli et Constantinopoli, al presente ha 100 galie; 50 tra fuste et pasandarie; 50 tra gripi et brigantini.

Item, l’à 3 galeaze, 3 nave et 2 barzoti, et al presente el fa far 2 barze da 600 in 800 bote per cadauna.