Come a dì 24, ricevute lettere di la Signoria per via di Corphù de 4 et 17 septembrio, zoè di la election di l’orator solenne al signor Turcho, et che dovesse notificarlo a quelli bassà, laudando la persona di l’orator qual era stà electo per la conservation di la bona paxe etc. Et cussì andoe da Acat bassà a caxa, perché da Embraim et Jacut bassà non potè haver audientia; et notificato quanto havea e come se li mandava l’annua pension dil Zante etc. Qual disse la matina dovesse andar a la udientia de li bassà, che si facea Porta, et cussì andò prima tolto da Pantaleo Corese ducati 500 d’oro veniciani a cambio per portarli per la pension dil Zante, el qual liberalissime li dete, offerendo più ancora se ne voleva, et li fece letere di cambio a pagar a Piero suo fratello de qui ducati 503 in oro, perché li tre andò in farsi far la cautione dil recever. Et cussì andato a la Porta a li signor bassà, notificò quanto li era stà per la Signoria nostra scrito, e di l’orator qual verà per mar, laudando la sua persona, poi presentò la pension. Tutti have piacer, et Embrai bassà disse la Signoria ha fato optima deliberation di mandar questo orator.