Item, come l’orator anglico era partito dal re, et che havia inteso da domino Francesco de’ Montibus orator napolitano, che havia lettere di 13 di Hungaria. Narava turchi haver preso per tratato uno castello nominato Sachol propinquo a l’Arza et havealo munito di zente, et che havia pigliato uno altro propinquo chiamato a Temesvar et havealo depredato et brusato insieme con molte ville; et si diceva che ’l re Ladyslao havia fato preparamenti di zente per mandar contra il ducha Zuam Corvin, et per questi movimenti de’ turchi le ha retenute, e trata apontamento con lui e volea il venisse a una dieta in Buda, et dicto ducha non se ha fidado, et il re ha deliberato mandar do prelati a uno loco neutrale, dove sarano insieme per veder di pacificar le cosse.