Scrive i coloquij abuti da Zacaria e la instrution datali. Item, mando’ a dimandar al sanzacho di la Valona el sopracomito e li homeni di la galia di Brandizo, si rupe al Pyro; el qual li mando’ a risponder, scriveria al signor; et par ditto sanzacho dubitasse di la venuta di esso zeneral in colfo. Item, a letere di Syo, dil consolo, di 5; avisi di 5 septembrio, di Pera. Che par sia nove, di 23 avosto, come quel Sophi prosperava; e il signor li mandava el bylarbei di la Natalia contra; et dito Sophi era intra’ in Anguli, tamen poi, per uno altro aviso, par il signor turco non vadi in Andernopoli; et a Pera era il morbo. Item, scrive di la galia dil papa, sopracomito sier Almoro’ Pixani, qual era discusida, e’ pur zonta a Ragusi, si come Zacaria la trovo’, per conzarla, e vera’ a disarmar. Item, lauda assai sier Alvise Venier, provedador di Corfu’, di le fabriche fate; el qual andera’ con le galie candiote, manda a disarmar, al suo capitaneato di Candia.