In la prima: come era venuto con l’armata lì, et la turchescha andò in golfo come scrisse, et dubita non sii tratato in Corphù, la galia Polana grossa stata a Modon era tornata in armata. Item, esser zonte tre nave di Candia con biscoti di Cypro, siché arà pan in armada fin mezo octubrio; starà lì al Zante a sopraveder quello farà turchi. Et che il capitanio francese volendo partirsi, vene da lui el gran maistro di la religion et monsignor di Siampagna capitano di la nave Celanta dicendo volevano levarsi, non li valse alcuna persuasion, et mandoe li tre provedadori dal capitano a persuaderlo non si partisse, non fu possibile, li promise etc. Et dicendo si pur si volea levar si levasse di note, et desse fama andar in levante a danni dei turchi, non volseno far
nulla, et di zorno si levò. Item, a dì ultimo zonse in armada la barza patron sier Sebastian Moro, li portò ducati 4000, el capitanio spazò in Cypro per formenti, et volendo pur saper qual cossa di Lepanto che nulla intendeva, mandò do galie sotil verso Lepanto a la volta di golfo,quale trovò un bregantin, li disse Lepanto si havia reso salvo l’aver et le persone, cossa zà per avanti tramata con lepantini, et haver da uno come in porto erano galie turchesche. Item, mandò il vice armirajo di Modon con lettere a quel rector di Lepanto confortandolo, non era ritornato, dubitava non fusse stà preso da’ turchi. Item, li nostri di l’armata erano sublevadi non volendo piò star su le galie per esser passati quasi mexi 6, siché si trova in questi termini. Manda lettere aute da Corom, provederà a custodir li altri lochi, et bisogneria mandar fanti in levante et far provision, facea fortifichar il Zante, et li homeni abitanti zà vendevano li cavalli per partirsi, à fato far proclame che chi andava via perdeseno le lhoro possession, il castello si fortificava, à posto uno contestabele chiamato Moro Biancho con page ..., et par ponesse provedador al Zante sier Nicolò Marzello era sopracomito, et in suo locho messe sier Nadal suo fiol per sopracomito, et questo fè perché sier Nicolò Fero, era lì provedador, havia tanta paura non voleva restar come scriverò al loco suo più avanti, dimanda polvere, monition etc. Et starà lì con l’armada a veder l’exito, etc.