Come a dì 6 avosto ussì l’arma turchescha di Portolongo, et largose mia 8 con bonaza, li nostri li andò adosso, et quella subito ritornò ivi. A dì 8 iterum ussite con bonaza remizando a terra, andò al Zonchio, et nostri sora vento per la provenza, sorse la turchescha al Scojo, et nell’intrar andò a fondi la soa nave di botte 600 carga di monition. A dì 10 la ditta ussite fuori et a terra via andò verso el Scojo zercha mia do. A dì 12 el capitano zeneral et provedadori deliberò de investir, la qual armata nemica è nave do di 3000 botte, una con homeni 1000 tra janizari et marinari, l’altra di botte 2000 con homeni 700, nave do di botte 700, barzoti 14 di botte 400 in zoso, galeote tre con li soi castelli et balaori, galie sotil 90, fuste 90, palandarie et schierazi 40, summano vele numero 241. In questo interim zonse in la nostra armada sier Andrea Loredan era provedador a Corphù con gripi 14, et montò su la nave prima investiteno; et il capitano di le nave, sier Alvixe Marzello, vene a investir la galia patron sier Polo Calbo, et tagliò le soste, et non se distrigò. Le altre nostre, zoè Armera et Pandora investì, et se incadenò con la nave dil Turcho, et tutte tre si brusò et andono a fondi, scapolati di le nostre solum 30 homeni, di le grosse solo, sier Vicenzo Polani patron investì la nave capitana preso un schierazo, et andò in mar. La note la nostra armada voltizoe in mar, tutta però divisa et sparpagnata. Et vene nova per uno gripo come l’armata francese era zonta al Zante, il zeneral si levò et vene al Zante, et non la trovò, la qual era stata et partita per venirlo a trovar lui, et a dì 20 l’azonse in armada, nave 16, galie 3, fuste 2 et uno bragantin, velle 22. A dì 22 l’armata turchescha zonse a castel Tornese, fo terminà per nostri investirla, et francesi et tutta l’armata erano desiderosi, la qual armata era in terra et in pocho fondi, et il zeneral messe in hordine 6 nave vechie per mandarle a brusar, et dato tal hordine turchi fono avisati, unde quella mattina a dì 23 si levò, et vene contra la nostra, fo comandà nostri non se apizase, unde turchi preseno animo, et venuti avanti, et nostri contra, adeo li deteno la caxa fin in terra: fo preso per nostri galie 3 et una fusta, et altri navilii butati a fondi. A dì 24 il capitano zeneral mandò per li patroni di galie et nave, et messe pena a tutti dovesseno investir, et fo fato comandamento a le galie grosse si dovesse seguir li soi capitani, tamen andò la barza grossa, et do nave francese, et galie a un trar di bombarda verso l’arma turchescha, et si saludono di bombarde, et zonse il zeneral fazendo vigoria, tamen niun si volse acostar. Visto francesi tal disordine, etiam lhoro non investiteno. Or il zeneral minazò tutti si la mattina non investisseno, ch’era a dì 25 ditto, et l’armata turchescha si levò prima, et tirò a la volta dil golfo di Lepanto, et la nostra li montò avanti, et il provedador sier Nicolò da cha da Pexaro andoe comandando a le galie investisse, unde tre galie grosse investì, et una aganzò una galia sotil sora vento, et l’altra sotto vento, et le prese tutte do, et turchi 50 vivi, et altri ne prese altre galie sotil, zoè sier Alvixe Marzello patron al trafego; et se cazò fuogo in una di ditte galie nimiche, et brusò il parlamento et se deliberò: concludendo chi scrive se tutti havesse fato el suo dover havevamo victoria, perché quella armata era una salata a la nostra. A dì 26 fo consultà di andar a Nepanto, et francesi non volse, et si partì quel capitano con la sua armata et andò a la Zefalonia, et a dì 27 tutta l’armata nostra andò al Zante, hessendo intrata la nimicha in golfo, e apresentata sotto Nepanto a dì 29 di zuoba quella terra a’ turchi si rese, come dirò  più avanti. Et è da saper niuna nostra galia in 4 congressi non have alcun danno, solum dil brusar di le do nave, et dil Brocheta fo sfondrato, et 6 caravele mandate per brusar l’armata, tamen fo grandissimo mal de 800 homeni peridi su le nave et molti anegati, et niuna galia li deva ajuto. Et avanti descriva altro noterò le nave fono brusate, et la valuta come poi fo extimate: la nave di sier Tomà Contarini, patron Antonio de Stefano, ducati 2447; di sier Piero Barbo et figli, patron Vicenzo Saratom, ducati 1057; di sier Bernardin Loredan, patron Marco di Bossina, ducati 861; barzoto di sier Lucha Donado, patron Cabriel da Monte, ducati 822; la caravela di sier Zuam Bragadin et figli, patron Stefano de Mathio, ducati 674.