Domente queste cosse in Italia segueno, in Levante acadete gran novità, perhoché a dì 15 mazo, per lettere di Francesco Bernardo consolo di Alexandria, se intese alcune nove dil Cajaro, le qual saranno qui sotto scrite. Et che in Alexandria non si feva nulla per questa comotione. Et la nuova dil Cajaro è questa.

Sumario di nuove di Levante. Come, a dì primo di febraro passato, Campsom Campsomie armiragio grando, dubitando de i signor forausciti che doveano vegnir al Cajero, feze chiamar el forzo de li signori dal Cajaro, e lì feceno conventione de farlo soldam, et lui, a l’incontro, de mantegnirli et farli grandi. Fata la convention, la sera questo Campsom, che havea dubio de tre de quelli armiragii de cento lanze, li fece amazar, et la matina sequente, che fo a dì 21 ditto, se partì con 4000 cavali et andò verso el castello dove sta el soldam, et prese la prima porta. Zilebi che erano in castello a la vardia per num. 800, tra li qual 200 negri, li fo a l’impeto, et virilissimamente combaterono et feceno tirar adreto dicto Campsom, e durò la bataglia più di hore 8. Stete cussì fino a li 4 del mexe di zener, et a dì 4 la matina, hore 2 avanti zorno, dete una altra bataglia al castello, et quelli dentro strenuamente se defeseno. Et fo più presto cossa divina che humana, perché contra de lhoro, zoveni inexsperti, senza capo, resistesino a tanto impeto. Fo ferito da una freza in la gola el dicto Campsom, in modo che li soi spaventati se meseno in fuga, et lui insieme fugite. Et li zilebi usiteno fori, et meseno a sacho assai caxe del Cajero, et quelle de asse brusate, et tra li altri sacomanorono zenovexi et tolseli duc. 2000; poi introrono in castello. I qual zenovexi se dolseno al soldam, et fezeli dar ducati 1000 et ducati 1000 de’ dar in Alexandria. Stete la cossa cussì fino a dì 20 dil mexe. Et a dì 20, ditto Campsom, con cavali 800 vene a Sbucha loco tribunal del Cajero, et lì sentò come soldam, et fece far publicha crida che chi [635] volesse vegnir da lui, a li mamaluchi li daria duc. 300 per uno et uno cavalo. Et niuno se mosse: et zilebi del castello, sentendo questo, ussiteno fuori per esser a le man, dove, temendo el dicto Campsom usite fori de la terra per andar verso Damasco, dove in strada trovò el diodar grando foresito che tornava al Cajero con zercha cavali 500, et foli a l’impeto. El qual diodar se feze forte; feze poi subito saper a lo resto de le sue zente che vegniva con lui che erano a Gazara del caso seguito, che era mamaluchi 1000 et arabi 3000, i qual subito veneno, et la matina sequente fono a le mano con dicto Campsom. Et prexe 350 vivi, e ’l resto, insieme con ditto Campsom, ut dicitur, fono morti. De ché, de lì a zorni 6, fo portate al Cajero teste 34 di signori morti, tra le qual se dicea esser quella di Campsom. Ma non fu vero, come poi se intese. Et el diodar se aspetava zorni do da poi con schiavi in hordine 350. El soldam, per tal nova, havea fatto grandissima festa et alegreza. Et questa nova vene del Cajaro. Copia de una lettera di Alexandria venuta. Nara di le nove dil Cajero. Questo signor soldam zoveneto ancor regna, el qual con el favor del signor Campsom Campsummie, che cussì etiam era la volontà de’ zilebi per tochar la paga, fo facto soldam, essendo l’ogieto, per li segni se vedeva, di farse poi esso Campson soldam, a tempo e con più favor e mancho concorentia, fugito el fo el signor diodar grando suo inimicissimo con cinque altri armiragii de mile lanze tra el signor sidibacho che era michanad, el qual fo facto quando fo cazato ditto Campson Campsomie, el signor Ainel Casif, el signor Zenen, el signor Cartabei et el signor Zenen Almesbega, et mandati poi el signor Temeret, el signor Tanibech Cara qui in prexon in Alexandria. Et in logo del dicto Temeres, dicto Campsom se facea armirajo grando. Questo ocorse da poi pochi zorni de la morte del signor soldam vechio. Le cosse son cussì passate fino a l’intrar de fevraro. Presentendo questo signor Campsom Campsomie, che pretendeva a farse soldam, che già havea habuto la fede da tutti li altri armiragii grandi, et cussì haveano zurato, che per instigation d’altri vegniva arecordato al signor soldam, et che el cerchava de far ritornar el diodar grando e tutti gli altri armiraglii fuziti contrarii et inimici del signor ditto Campsom Camsomie, usò una arte questui mostrando con el signor soldam esser de opinion che tutti vegnisse, et pacificarse con tutti. El signor soldam scrisse al diodar grando, e poi fo fate cride che tutti che erano fuziti doveseno liberamente ritornar, che a tuti sariano restituiti li soi officii. Tornò molti chaschi e mamaluchi che erano fuziti, partesani de quelli signori, et ritornono tutti li signor armiragii, excepto che el diodar grando. Zonti nel Cajero, andorono a salutar el signor soldam, el qual li feze bona ciera. Pur li parse debito, per simular, andar a visitar a casa el signor Campsom Campsomie, et essendo a sua visitacion, ne feze prender tre: el signor Zichbech, el signor Ainel Casis et Zenen zerman del soldam, li qual si estimano li facesseno morir, ch’altramente fin qui non se puol prosumer, per non se sentir altro di lhoro, et anche cussì vien acertato. Subito retenuti li ditti signori, Campsom Campsomie cavalchò con tutti li altri armiragii verso el castelo per farse soldam. Si atrovava bona parte de’ zilebi fora dil castello, et foli dicto che ’l signor Campson haveva cavalcato verso el castelo con tutti li altri armiragii per farse soldam. E subito quelli cavalcorono verso el castello, et quelli dentro haveano serato le porte, et obstava con bombarde e schiopeti che nium se acostasse, perché tegno non havesse intendimento cum zilebi, credendo li bastasse el favor di tutti li armiragii et far la cossa improviso et presta. Tra lo obstaculo de quelli dentro et de quelli de fuora, che fo a le man cum loro et pochi fo feridi et morti, non have sua intention. Promesse in questa barufa la madre del soldam a li zilebi duc. 200 per uno et un cavalo, ricomandandoli el fiol, de che loro erano stati schiavi del padre e da lui haver habuto optima compagnia. Quel signor Campsom Campsomie et altri armiragii se meseno in fuga et absentose, i qual armiragii de mille lanze son questi con el ditto signor Campsom: el signor Campsom Belfi, el signor Campsom Semi, el signor Casum, el maemegdi, el signor Cartabei capitano del bairi, el signor Ixbech el Carandar, el signor Tanibech Zemeli, el signor Casabei, el signor Mamei, el Tambalat che era diodar. Visto questo el signor soldan, esser volti contra de lui tutti li armiragii, subito mandò comandamento de qui che ’l signor Temeres e ’l signor Tamberdi Cara, che era de qui in prexon foseno lassati, e subito dovesse andar al Cajaro. Et cussì subito andò. Mandò etiam, per el signor diodar grando; ma fin qui non ha parso. Tegno che dubiti de questi signori, ch’è tutti soi inimici, che non li metesse le man adosso. El timon adesso di questo signor soldam è questi do armiragii, zoè Temeres et Tanibech Cara, benché altri armiragii de mile lanze non sia tutti con Campsom Campsomie. El soldan ha fatto la paga a li zilebi di quello li son stà promesso. Li bisognerà danari assai, che son certo ne habbi, perché el soldam vechio non atendeva se non a cumular danari. Questo me par justo da creder che ’l non habbi a regnar troppo, perché desgraderà molto la signoria del Cajero se uno fiol de la zente potesse esser soldam. Niente di meno, potria esser che questi zilebi, per esser stati schiavi del padre, el mantegnisse un tempo. Staremo a veder quelo sarà. In questo tempo, el Cajaro è stato soto sopra. Mamaluchi et zilebi andavano sacomanando case de chi li pareva. Fo sacomanato molti zudei, et similmente la casa del torciman grando, benché lui fo cauto che scose el meglio, e certi zenovesi che erano al Cajero, fra li altri el patroni de la nave grossa Camila che dia haver abuto danno di più di ducati 600 tra lhoro sie. Nostri merchadanti che erano de lì, se scose, per modo che non ha abuto danno alcuno. I qual era: ser Lunardo di Prioli, ser Alvixe Bon fo di misier Scipiom, ser Andrea Nicoloxi, ser Almorò Cabriel, ser Alvise Moro, ser Daniel Copo, et ser Filippo Corner. Se dubita la cossa non habbi a star cussì. Questi tanti signori a uno sarà gran faticha volerli cazar del paese. Asse fatto forte el signor soldam in castello de vituarie e di quello à bisognato. Con lui non se atrova salvo quelli do predicti armiragii Temeres et Tambech Carra. Et per quello havemo nuovamente a dì 20 del pasato, zoè fevrer, vene el signor Cason Casommie fuora, et cavalchò con bona parte di preditti armiragii dai qual havea obedientia come soldam, et mesese in uno luogo nel Cajaro chiamato l’Osbechie, congregado la sua zente, che non possemo saper che numero havia ma vien dito ha 500 cavali, che tegno sieno molto piuj, et lì dominava la terra. Da basso havea facto uno Lueli et altri officiali, et feva far cride come soldam, che ognum stesse de bona voglia che non li seria fato dispiacer, et prometeva per mamalucho et zilebo che vegniva con lui ducati 300. El soldam, con i zilebi, steva seradi in castello. Vien ditto esser in castello da 5 in 6 milia zilebi. El soldam zovene de castello fece far una crida che tutti li armiragii vegnisse liberamente, da quatro in fuora che havea per rebelli, che a questi non volea perdonar, et a tutti li altri volleva mantegnirli in le sue signorie. Non ne havea voluto andar niuno, como che voleno mantegnir la promessa hanno facto al signor Campsom Campsomie; ma la causa è etiam perché non se fidano. Et le cosse dil Cajaro credo mai più sia state cussì rote. Non so che fin arano, né quando. Per quel se vede, questo Campsom vol lassar la vita o farse soldam se ’l potrà. Se atrova al presente qui in Alexandria in preson el signor Campsom Femi armiragio di mile lanze, con alguni chaschi che fu mandati et presi quando fo quella novità. L’armiragio Lueli, dal Cajaro, che era pur da questa parte, fuzendo fo amazado da’ arabi. Era uno valentissimo homo; ma ne amazò molti di lhoro avanti che lui fusse morto.