Et zonse uno navilio con muschatelli di sier Alvise d’Armer, partì a dì 13 Luio di Candia. Dice il patron, a la Fraschia intese Rodi aver auto 7 bataglie da turchi e aversi virilmente difeso, et amazà una infiniti di turchi, et aveano butà a fondi chi dise 14, chi 8, et chi 6 galie turchesche, che voleano tenir il porto, e aver frachassà e roti certi castelli di legno e repari de turchi fati apresso la terra; sichè quelli di Rodi si portano valentemente. Et che una nostra galia, soracomito sier Lodovico Querini, andava in Cypro, overo veniva, turchi la tolse e con 5 altre soe con l’insegne di san Marco erano venute per intran in porto, mostrando venir a darli socorso, e che quelli di Rodi le aveano buia a fondi. Tamen a bocha è ste nove e non si crede, perchè sier Lodovico Querini soracomito era a Constantinopoli aspetando sier Toma Contarini baylo per venir in qua. Potria ben esser sier Nicolò Querini, che con altre 4 galie per il Proveditor di l’ armada fo mandate in Cypro.