Da Constantinopoli, di sier Andrea di Priuli baylo, di 14 et 17 Mazo.

Come el Signor li havia molto dolesto, zoè. Achmat bassà per suo nome con esso Baylo, dil suo schiavo fo retenuto per sier Nicolò Justinian baylo nostro a Napoli di Romania, dicendo volerlo aver al tutto, si non el Signor farà retenir do venitiani per questo, inferendo lui Baylo et uno altro.

Item, che Peri bassà li ha dito, che fin 6 mexi turchi verà a foter le nostre done; ma fense di rider; et che Achmat instava el Signor dicendo non indusiase a romper a la Signoria, che mai potrìa trovar la ocasion mior di questa di sto schiavo, per esser rota la paxe.

Item, altri avisi, ut in litteris. Ancora fo leto una letera drizata ai Cai di X. Come el Signor havia mandà per le stalle per veder di aver cavalli per li ianizari per andar a la impresa di Hongaria, e mal havia potuto trovarne, si che tien non torà quella impresa per adesso.