Fu posto, per sier Alvise Mocenigo cavalier consier, quod restituantur bona rebellium etc., et per il Collegio fo messo conzar la cossa con darli 5000 ducati a l’anno per questo conto, da esser partidi fra loro; et fu disputation. Parlò sier Piero Capello savio dil Consejo; li rispose sier Alvise Mozenigo preditto. Poi parlò sier Zorzi Corner procurator, savio dil Consejo, uno de deputadi, dicendo li bastava l’animo conzar con diti ducati 5000. Et cussi il Mocenigo non mandò altramente la parte. A li altri capitoli, fo preso darli 8 galie in aiuto dil reame di Napoli, in caxo fosse invaso dal re di Franza. Item, ducati 200 milia in 8 anni, et 33 milia per resto vechio di le trieve. Sier Zuan Landò savio ai ordeni, non potendo suo padre impazarsi, messe non prometer 8 galie per le cose dil Turcho et parlò; non gli fu risposto. Ave 7 balote, et cussi fo expedita la materia. Vedaremo quello farà li deputadi; ma si tien si concluderà et presto.