Di Hongaria, di sier Lorenzo Orio doto, et cavalier, orator nostro, date a Buda, a di 3 Zener.
Come quel regno era in grandissimo pericolo se li principi christiani non li presteva aiuto, et come havia inteso la morte dil papa Lion ; et che pregavano Idio fusse creato in loco suo uno pastor bon per la christianità, la qual in questi tempi ne ha gran bisogno. Scrive come il Danubio è aiazato verso la Transilvania, però dubitavano quelli turchi restati a custodia di Belgrado non calaseno su l'Hongaria a far danni, per il che era stà mandato certe zente a quelli confini.
Item, come si andava scodando quelle imposition, el che si preparava per far la incoronation di la serenissima regina, per il che quella Maesti, scriveva una letera a la Signoria nostra di questa tal incoronation da esser facta; la qual letera è in bergamena, e la copia fo leta in Colegio et poi in Pregadi, e sarà qui avanti.